អ្នកគ្រូបង្រៀនបារម្ភសុវត្ថិភាពក្រោយពីមានករណីរំលោភសម្លាប់គ្រូម្នាក់នៅខេត្តបាត់ដំបង

គ្រូបង្រៀនជាច្រើនបានបង្ហាញការព្រួយបារម្ភនៅលើបណ្ដាញសង្គមហ្វេសប៊ុក ខណៈថ្មីៗនេះមានករណីប្រទះឃើញអ្នកគ្រូបង្រៀនម្នាក់នៅស្រុកសំឡូត ដែលជាស្រុកមួយឋិតក្នុងខេត្តបាត់ដំបង ស្លាប់ បន្ទាប់ពីបាត់ខ្លួនពីផ្ទះត្រឹមមួយថ្ងៃប៉ុណ្ណោះ កាលពីថ្ងៃទី ១៧ ខែធ្នូ ឆ្នាំ២០១៩ ។ ហេតុការណ៍នេះបណ្ដាលឲ្យមានការព្រួយបារម្ភពីសុវត្ថិភាពផ្ទាល់ខ្លួនរបស់អ្នកគ្រូបង្រៀនជាច្រើនដែលបានមន្ទីរអប់រំចាត់ចែងឲ្យទៅបង្រៀននៅតំបន់ដាច់ស្រយាលនានា ក្នុងប្រទេសកម្ពុជា ។

អ្នកគ្រូបង្រៀនម្នាក់ត្រូវបានគេប្រទះឃើញស្លាប់នៅត្រង់ចំណុចឃ្លាំងផ្ទុះ ស្ថិតនៅភូមិបឹងរុន ឃុំ សំឡូត ស្រុកសំឡូត ខេត្តបាត់ដំបងកាលពីវេលាម៉ោង៥ល្ងាចថ្ងៃទី១៦ខែធ្នូ ក្រោយពីបាត់ខ្លួនមិនឃើញមកផ្ទះកាលពីថ្ងៃទី ១៥ ខែធ្នូ វេលាម៉ោងប្រមាណ ១១ ពេលចេញពីបង្រៀនសិស្ស។ នេះបើយោងតាមរបាយការណ៍របស់សមត្ថកិច្ច។

ជនរងគ្រោះឈ្មោះ អូន ចន្ថា ជាគ្រូបង្រៀននៅសាលាបឋមសិក្សាភូមិអំពិលលើបច្ចុប្បន្ននៅភូមិបឹងរុនឃុំសំឡូតមានប្តីឈ្មោះ ណាង មានកូន១។សមត្ថកិច្ចជំនាញរង់ចាំលទ្ធផលការធ្វើកោសល្យវិច័យ ខណៈការសន្និដ្ឋានជំហានដំបូងអាចជាករណីរំលោភ។ គេហទំព័រកម្ពុជានឹងរាយការណ៍បន្ថែមទៀតទាក់ទងនឹងករណីនេះ។