វិទ្យុបារាំង RFI ៖ មន្ត្រីជាន់ខ្ពស់នៃក្រសួងមហាផ្ទៃនៅថ្ងៃទី១៨កក្កដានេះ បានដាក់ការសង្ស័យជំហានបឋមថា អ្នកគាំទ្រអតីតបក្សប្រឆាំងទំនងជានៅពីក្រោយការប្រឌិតព័ត៌មានដែលថា សមាគមវៀតណាម អំពាវនាវឲ្យពលរដ្ឋវៀតណាម ចូលរួមបោះឆ្នោតនៅកម្ពុជា។ ជុំវិញការសន្និដ្ឋាននេះ មន្រ្តីជាន់ខ្ពស់នៃអតីតបក្សសង្គ្រោះជាតិបានអះអាងថា ទោះក្នុងកាលៈទេសៈណាក៏ដោយ ក៏អ្នកគាំទ្រអតីតបក្សសង្គ្រោះជាតិគ្មានផ្លូវនយោបាយទុច្ចរិតបែបនេះដែរ។
លោក ខៀវ សុភ័គ អ្នកនាំពាក្យក្រសួងមហាផ្ទៃបានអះអាងប្រាប់វិទ្យុបារាំងអន្តរជាតិ RFI នៅថ្ងៃទី១៨ខែកក្កដានេះថា អាជ្ញាធរកំពុងបើកការស៊ើបអង្កេតយ៉ាងយកចិត្តទុកដាក់ ក្រោយសមត្ថកិច្ចដាក់ការសង្ស័យជំហានបឋមថា អ្នកគាំទ្រអតីតបក្សសង្គ្រោះជាតិ ឬក៏អ្នកគាំទ្រចលនាសង្គ្រោះជាតិ ជាអ្នកនៅពីក្រោយការប្រឌិតព័ត៌មានដែលថា សមាគមវៀតណាម អំពាវនាវឲ្យពលរដ្ឋវៀតណាម ចូលរួមបោះឆ្នោតនៅកម្ពុជា។
អ្នកនាំពាក្យក្រសួងមហាផ្ទៃបានគូសបញ្ជាក់ថា ការណ៍ដែលអាជ្ញាធរហ៊ានសន្និដ្ឋានដូច្នេះគឺដោយសារតែអ្នកប្រើប្រាស់បណ្ដាញសង្គមហ្វេសបុកភាគច្រើនដែលជាអ្នកគាំទ្រអតីតបក្សសង្គ្រោះជាតិ បានធ្វើការចែករំលែកព័ត៌មាននេះតាមគ្នា។ ហើយប្រសិនបើអាជ្ញាធររកឃើញអ្នកប្រឌិតព័ត៌មាននៅក្នុងប្រទេស ពួកគេច្បាស់ជាគេចមិនផុតពីសំណាញ់ច្បាប់ឡើយ។ យ៉ាងណាក៏ដោយ ប្រសិនបើពួកគេមានសញ្ជាតិពីរ គឺអាជ្ញាធរនឹងដោះស្រាយតាមផ្លូវច្បាប់បែបផ្សេង។ នេះបើតាមលោក ខៀវ សុភ័គ។ សម្រាប់អ្នកនាំពាក្យក្រសួងមហាផ្ទៃ ព័ត៌មាននេះគឺជារូបភាពញុះញង់រាំងខ្ទប់ដំណើរការបោះឆ្នោត និងរើសអើងជាតិសាសន៍។
យ៉ាងណាក៏ដោយ លោក អ៊ូ ច័ន្ទរ័ត្ន អតីតតំណាងរាស្ត្រនៃអតីតគណបក្សសង្គ្រោះជាតិបានអះអាងថា អ្នកគាំទ្រអតីតគណបក្សសង្គ្រោះជាតិបច្ចុប្បន្ន គ្មានផ្លូវធ្វើនយោបាយទុច្ចរិត កេងបន្លំ ដូចការសន្និដ្ឋានរបស់អាជ្ញាធរឡើយ។ សម្រាប់ លោកអ៊ូ ច័ន្ទរ័តុ្ន ផ្ទាល់ លោកបញ្ជាក់ថា លោកមានការភ្ញាក់ផ្អើលដែរពេលឃើញការអំពាវនាវរបស់សមាគមវៀតណាម ឲ្យពលរដ្ឋវៀតណាមចូលរួមបោះឆ្នោតនៅកម្ពុជា។ បើទោះជាព័ត៌មាននេះមិនមែនជាការពិតក៏ដោយ លោក អ៊ូ ច័ន្ទរ័ត្នបានចោទសួរទៅកាន់អាជ្ញាធរថា តើការអនុវត្តច្បាប់សញ្ជាតិនៅកម្ពុជា ពិតជាដូចទៅនឹងការចុះផ្សាយនេះដែរទេ?
គួររម្លឹកថា សារដែលសមាគមវៀតណាមនៅកម្ពុជាអះអាងថា ជាព័ត៌មានប្រឌិតនោះបានជម្រុញពលរដ្ឋឲ្យទៅបោះឆ្នោតដោយមានភ្ជាប់លក្ខខណ្ឌចូលសញ្ជាតិ។ តាមរយៈសារអមដោយរូបភាពឃោសនាបោះឆ្នោត របស់គណបក្សប្រជាជនកម្ពុជានៅលើផ្ទៃទឹកនេះ ប្រធានសមាគមខ្មែរ វៀតណាម បានចាត់ទុកថា ការប្រឌិតព័ត៌មានបែបនេះ គឺជាការញុះញង់ ដើម្បីបង្ខូចកេរ្តិ៍ឈ្មោះសមាគមវៀតណាមនៅក្នុងប្រទេសកម្ពុជា៕
Fresh News : ប្រធានសមាគមខ្មែរ-វៀតណាមនៅកម្ពុជា ទាត់ចោលទាំងស្រុងចំពោះការប្រឌិតព័ត៌មានរបស់ក្រុមប្រឆាំងថា ខ្លួនបានអំពាវនាវឲ្យពលរដ្ឋវៀតណាមទៅចូលរួមបោះឆ្នោត
(ភ្នំពេញ)៖ ប្រធានសមាគមខ្មែរ-វៀតណាមនៅកម្ពុជា លោក ស៊ឹម ជី តាមរយៈបណ្តាញព័ត៌មាន Fresh News នៅយប់ថ្ងៃទី១៧ ខែកក្កដា ឆ្នាំ២០១៨នេះ បានប្រកាសទាត់ចោលទាំងស្រុងនូវការប្រឌិតរបស់បណ្តាញព័ត៌មានក្រុមប្រឆាំងដែលបានផ្សព្វផ្សាយថា សមាគមវៀតណាមបានអំពាវនាវឱ្យប្រជាពលរដ្ឋវៀតណាម ទៅចូលរួមបោះឆ្នោតនៅកម្ពុជា។
ការចេញមុខទាត់ចោលយ៉ាងដាច់អហង្ការរបស់ប្រធានសមាគមខ្មែរ-វៀតណាមនៅកម្ពុជាបែបនេះ បានធ្វើឡើងបន្ទាប់ពីមាន Facebook ក្លែងក្លាយមួយដោយដាក់ឈ្មោះថា «សមាគមវៀតណាមនៅកម្ពុជា» រួមទាំងវេបសាយរបស់ក្រុមប្រឆាំងបានផ្សព្វផ្សាយ កាលពីម្សិលមិញនេះថា សមាគមវៀតណាមនៅកម្ពុជា បានអំពាវនាវឱ្យពលរដ្ឋវៀតណាម ចូលរួមចំពោះបោះឆ្នោតជាតិ នៅថ្ងៃទី២៩ ខែកក្កដា ឆ្នាំ២០១៨ ខាងមុខនេះ។
ប្រធានសមាគមខ្មែរ-វៀតណាម បានចាត់ទុកថា ការប្រឌិតព័ត៌មានបែបនេះ គឺជាការញុះញង់ ដើម្បីបង្ខូចកេរ្តិ៍ឈ្មោះសមាគមរបស់លោកនៅក្នុងប្រទេសកម្ពុជា ហើយករណីនេះ ខាងសមាគមរបស់លោក បានធ្វើពាក្យបណ្តឹងទៅក្រសួងមហាផ្ទៃ ជាច្រើនដងរួចហើយដែរ។
លោក ស៊ឹម ជី បានបន្ថែមទៀតថា នៅថ្ងៃទី១៨ ខែកក្កដា ឆ្នាំ២០១៨ស្អែកនេះ លោកនឹងធ្វើសេចក្តីថ្លែងការណ៍មួយដើម្បីទាត់ចោលនូវការប្រឌិតព័ត៌មាននេះ និងដាក់ពាក្យបណ្តឹងប្តឹងបន្តទៀត ទៅក្រសួងមហាផ្ទៃ ដើម្បីជំរាបឱ្យក្រសួងមានសមត្ថកិច្ច បានយល់អំពីបញ្ហានេះ ហើយសុំឱ្យមានវិធានការ។
យ៉ាងណាក៏ដោយ លោកមិនទាន់មានតម្រុយណា អំពីក្រុមដែលប្រឌិតព័ត៌មាននេះនៅឡើយទេ ខណៈដែលលោកក៏បានប្រាប់ទៅសារព័ត៌មានមួយចំនួនរួចហើយ នាពេលកន្លងមក ដោយបានបដិសេធនូវការផ្សព្វផ្សាយញុះញង់បែបនេះ៕
Fresh News : ក្រសួងមហាផ្ទៃ បើកស៊ើបអង្កេត និងប្តឹងទៅក្រុមហ៊ុន Facebook ចំពោះការប្រឌិតព័ត៌មានថា សមាគមវៀតណាម អំពាវនាវឲ្យពលរដ្ឋវៀតណាម ចូលរួមបោះឆ្នោតនៅកម្ពុជា
(ភ្នំពេញ)៖ នាយឧត្តមសេនីយ៍ ខៀវ សុភ័គ អ្នកនាំពាក្យក្រសួងមហាផ្ទៃ បានថ្លែងប្រាប់បណ្តាញព័ត៌មាន Fresh News ឱ្យដឹងនៅយប់ថ្ងៃទី១៧ ខែកក្កដា ឆ្នាំ២០១៨នេះថា ក្រសួងមហាផ្ទៃ កំពុងស៊ើបអង្កេត និងប្តឹងទៅកាន់ក្រុមហ៊ុន Facebook ដើម្បីចាត់វិធានការចំពោះ Facebook ក្រុមប្រឆាំងមួយចំនួនដែលបានប្រឌិតព័ត៌មានថា សមាគមវៀតណាមអំពាវនាវឲ្យពលរដ្ឋវៀតណាម ចូលរួមបោះឆ្នោតនៅកម្ពុជា ដើម្បីបង្កចលាចលនៅកម្ពុជា។
នាយឧត្តមសេនីយ៍ ខៀវ សុភ័គ បានអះអាងថា ការផ្សព្វផ្សាយបែបនេះ គឺជាការប្រឌិតព័ត៌មានរបស់ក្រុមប្រឆាំងប៉ុណ្ណោះ ហើយក្រសួងកំពុងស៊ើបអង្កេត ដើម្បីចាត់វិធានការជុំវិញបញ្ហានេះ ដែលលោកសង្ឃឹមថា អ្នកប្រព្រឹត្តល្មើសច្បាប់ ក្នុងចេតនារំខានដល់ការបោះឆ្នោតនៅកម្ពុជា នឹងត្រូវរកឃើញនៅពេលឆាប់ៗនេះ។
ការអះអាងអំពីវិធានការរបស់ក្រសួងមហាផ្ទៃនេះ បានធ្វើឡើងបន្ទាប់ពីមាន Facebook ក្លែងក្លាយមួយដោយដាក់ឈ្មោះថា «សមាគមវៀតណាមនៅកម្ពុជា» រួមទាំងវេបសាយ និងបណ្តាញ Facebook របស់ក្រុមប្រឆាំង បានផ្សព្វផ្សាយថ្មីៗនេះថា សមាគមវៀតណាមនៅកម្ពុជា បានអំពាវនាវឱ្យពលរដ្ឋវៀតណាម ចូលរួមចំពោះបោះឆ្នោតជាតិ នៅថ្ងៃទី២៩ ខែកក្កដា ឆ្នាំ២០១៨ ខាងមុខនេះ។
លោក ស៊ឹម ជី ប្រធានសមាគមខ្មែរ-វៀតណាមនៅកម្ពុជា តាមរយៈបណ្តាញព័ត៌មាន Fresh News នៅយប់ថ្ងៃទី១៧ ខែកក្កដា ឆ្នាំ២០១៨នេះ បានប្រកាសទាត់ចោលទាំងស្រុងនូវការប្រឌិតរបស់បណ្តាញព័ត៌មានក្រុមប្រឆាំងបែបនេះដែរ។
លោកបានចាត់ទុកថា ការប្រឌិតព័ត៌មានបែបនេះ គឺជាការញុះញង់ ដើម្បីបង្ខូចកេរ្តិ៍ឈ្មោះសមាគមរបស់លោកនៅក្នុងប្រទេសកម្ពុជា។ លោកនឹងធ្វើសេចក្តីថ្លែងការណ៍មួយ ដើម្បីទាត់ចោលនូវការប្រឌិតព័ត៌មាននេះនៅថ្ងៃស្អែកផងដែរ៕
Fresh News ៖ លិខិតពីប្រជាពលរដ្ឋ ពួកសង្គមងងឹតកំពុងបង្កើតព័ត៌មានក្លែងក្លាយបំពុលសង្គម!
(ភ្នំពេញ)៖ ក្រុមសង្គមងងឹតដឹកនាំដោយទណ្ឌិត សម រង្ស៊ី កំពុងប្រើឧបាយកលទុច្ចរិតគ្រប់បែបយ៉ាងដែលខួរក្បាលអសិរពិសរបស់ ពួកគេអាចផលិតបានតែរឿង
អាក្រក់ៗស្មោគគ្រោកដើម្បីបំពុលប្រជាពលរដ្ឋខ្មែរ។ ក្នុងចំណោមឧបាយកលទុច្ចរិតជាច្រើន ពួកគេបានបង្កើតព័ត៌មានក្លែងក្លាយដើម្បីប្រើជាមធ្យោបាយមួយក្នុងការ បំពេញគោលដៅដ៏ខ្មៅកខ្វក់របស់ខ្លួន។ ជាក់ស្តែងបន្ទាប់ពីបានយកព្រះមហាក្សត្រទៅលេងសើចក្នុងល្បែងបោកប្រាស់ប្រជាពលរដ្ឋ ដោយគ្មានកោតញញើតមក ក្រុមឧទ្ទាមក្រៅច្បាប់ដឹកនាំដោយ សម រង្ស៊ី បានបង្កើតព័ត៌មានក្លែងក្លាយមួយទៀត តាមរយៈការក្លែងបន្លំជាសមាគមវៀតណាមនៅកម្ពុជា ហើយអំពាវនាវឲ្យពលរដ្ឋវៀតណាមទៅ បោះឆ្នោតនៅថ្ងៃទី ២៩ កក្កដា។ គោលដៅរបស់ក្រុម សម រង្ស៊ី ដែលប្រឌិតព័ត៌មានក្លែងក្លាយនេះឡើងគឺ៖
ទី១៖ ដើម្បីបញ្ឆេះកំហឹងជាតិសាសន៍ឲ្យខ្មែរស្អប់ វៀតណាមដូចដែលពួកគេធ្លាប់បានធ្វើជាច្រើនទសវត្សរ៍មកហើយ។ ការដុតបញ្ឆេះកំហឹងពូជសាសន៍គឺជាស្នូលនៃ គោលនយោបាយរបស់ សម រង្ស៊ី ដែលបានអនុវត្តចាប់តាំងពីការបង្កើតបក្សដំបូងតាំងពីឆ្នាំ១៩៩៥ មក។ ជាគោលនយោបាយដែលពិភពលោកកំពុងស្អប់ខ្ពើមបំផុត តែវាក៍កំពុងពេញនិយមបំផុតសម្រាប់ក្រុមជ្រុលនិយមរបស់ សម រង្ស៊ី ពីព្រោះគោលបំណង ចុងក្រោយរបស់ពួកគេដែលបំផុសរឿងនេះ គឺដើម្បីឲ្យខ្មែរសម្លាប់ជនជាតិ វៀតណាមដូចពួកប៉ុលពត។
ទី២៖ ដើម្បីបំផ្លាញការបោះឆ្នោតថ្ងៃទី ២៩ កក្កដា ខាងមុខដូចដែល ពួកគេបាននិងកំពុងប៉ុនប៉ងសម្លាប់ប្រជាធិបតេយ្យនៅកម្ពុជាហើយ ងាកទៅដណ្តើមអំណាចតាមរយៈ ការបង្ហូរឈាម ដូចអតីតកាលឡើងវិញពីព្រោះពួក នេះយល់ថា ការបោះឆ្នោតមិនអាចឲ្យពួកគេឈ្នះគណបក្សប្រជាជនកម្ពុជាបានឡើយដោយសារ ប្រជាពលរដ្ឋខ្មែរមិនបោះឆ្នោតឲ្យពួកគេឡើយពីព្រោះតែខ្មែរស្អប់ខ្ពើមពពួកសង្គមងងឹត ដែលមិនចេះធ្វើអ្វីដើម្បីសង្គមទាល់តែសោះ គឺចេះតែបង្ករឿង ញុះញង់ បញ្ឆេះកំហឹង។ ម្លោះហើយ បានជាក្រុម សម រង្ស៊ី នេះកំពុងតាំងខ្លួនជាសត្រូវនឹងការបោះឆ្នោត។
ទី៣៖ ដើម្បីពង្វក់ស្មារតី ពលរដ្ឋខ្មែរជាពិសេសយុវជន ដែលកំពុងពេញនិយមលេង ហ្វេសប៊ុកឲ្យពុលនឹងព័ត៌មានមិនពិតដែលពួកគេប្រឌិតឡើង។ គោលដៅរបស់ក្រុមនេះគឺធ្វើយ៉ាងណាកុំឲ្យយុវជនដែលជាទំពាំងស្នងឬស្ស៊ី ទទួលបានព័ត៌មានពិត ព័ត៌មានល្អៗ ដើម្បីជាគ្រឹះកសាងគំនិតវិជ្ជមានសម្រាប់ជួយសង្គមឡើយ។ ផ្ទុយទៅវិញ ពួកសង្គមងងឹតដឹកនាំដោយ សម រង្ស៊ី ពង្វក់ខួរក្បាលយុវជនឲ្យពុលនឹងព័ត៌មានអាក្រក់ដើម្បីពួកគេងាយដឹកច្រមុះ ងាយបោកប្រាស់ ឲ្យបម្រើគោលនយោបាយទុច្ចរិតរបស់ខ្លួន។
ទី៤៖ ដើម្បីបម្រើមហិច្ឆតាចៅហ្វាយបរទេសរបស់ពួកគេ ក្នុងការបង្កើតចលនាបដិវត្តន៍ពណ៌នៅកម្ពុជា។ ដូចយើងបានដឹងស្រាប់ ក្រុមស្ថាបនិកចលនាបដិវត្តពណ៌ចាប់យក យុវជនឈាមរាវ និងជនសង្គមងងឹតជាក្រុមគោលដៅពីព្រោះក្រុមនេះជាជន ដៃដល់ពូកែជេរប្រមាថ វាយបំផ្លាញ និងអាចបង្កអំពើហិង្សាបានគ្រប់បែបយ៉ាង។ ដូច្នេះ ពួកគេត្រូវពង្វក់ស្មារតីក្រុមគោលដៅនេះឲ្យវង្វេង លែងដឹងខុសត្រូវទើបស្រួលប្រើ។ អ្វីដែលគេបានឃើញក្នុងហ្វេសប៊ុក របស់ក្រុមនេះជាឧទាហរណ៍ស្រាប់។ គេនៅចាំបានថា សម រង្ស៊ី ធ្លាប់បានប្រើប្រាស់ពួក ញៀនថ្នាំដើម្បីធ្វើបាតុកម្មឈានទៅផ្ទុះហិង្សាវាយកម្ទេច ដុតបំផ្លាញ និងបង្កឲ្យមានអំពើហិង្សារហូតដល់មានមនុស្សស្លាប់ និងរបួសកាលពីក្រោយការ បោះឆ្នោតឆ្នាំ ២០១៣ ដែល ពួកគេយកជាការសាកល្បងសម្រេចគោលដៅបដិវត្តន៍ពណ៌។ ប៉ុន្តែគោលដៅនេះត្រូវបរាជ័យទាំងស្រុងដោយសាររាជរដ្ឋាភិបាលបានដឹងផែនការ មុន ហើយវាយបំបែកទាន់ពេលវេលា រហូតធ្វើឲ្យពួក សម រង្ស៊ី ក្លាយជាឧទ្ទាមចោរព្រៃរកដីនៅមិនបាន។
សរុបទៅនយោបាយកខ្វក់ខ្មៅងងឹតរបស់ សម រង្ស៊ី គ្មានអ្វីជាអាថ៌កំបាំងឡើយ។ ពួកគេធ្លាប់បានអនុវត្តន៍តាំងពីច្រើនទសវត្សរ៍មកហើយ។ ឥឡូវនេះល្បិចកលរបស់ពួកគេកាន់តែ ពិសពុលជាងមុនទៅទៀត ដោយសារតែពួកគេខឹងសម្បារខ្លាំងណាស់ដែលឧបាយកលរបស់ខ្លួនត្រូវទទួលបរាជ័យជាបន្តបន្ទាប់ ស្ទើរតែទាំងស្រុងទៅហើយ។ ទោះយ៉ាងណា នេះគ្រាន់តែជាស្ថានភាពមនុស្ស ស្លឈាមតែប៉ុណ្ណោះ។ ល្បិចកលដដែលៗនេះមិនអាចធ្វើឲ្យប្រទេសនេះក្រឡាប់ចាក់ដូចដែលពួកគេប៉ងបានឡើយពីព្រោះ តែយើងមានបង្អែករឹងមាំបំផុត នោះគឺរាជរដ្ឋាភិបាលដឹកនាំដោយនាយករដ្ឋមន្ត្រី ហ៊ុន សែន ដែលជាអ្នកធានាការពារសន្តិភាព ស្ថិរភាពសង្គម ការពាររបបប្រជាធិបតេយ្យ សេរី ពហុបក្ស និងរបបរាជានិយមអាស្រ័យធម្មនុញ្ញនៅកម្ពុជា។
ផ្ទុយទៅវិញ ក្រុមសង្គមងងឹតនេះនឹងស្គាល់តែក្តីវិនាសងើបមុខ មិនរួចឡើយក្រោមបណ្តាសាររបស់ពលរដ្ឋខ្មែរ បណ្តាសាររបស់បារមីថែរក្សាព្រះរាជាណាចក្រកម្ពុជា និងបណ្តាសាររបស់ទេវតាថែរក្សាទ្វីបលោកទាំងមូលដែលជាអ្នកការពារអំពើល្អនៅលើផែនដីនេះ៕
ដោយ៖ ព្រឹទ្ធាចារ្យម្ចាស់ស្រុកម្នាក់
The post អាជ្ញាធរសង្ស័យថាអតីត CNRP នៅពីក្រោយសំណុំរឿងអំពាវនាវ ឲ្យពលរដ្ឋវៀតណាមទៅបោះឆ្នោត appeared first on Khmer Readers.