ការឃោសនាបោះឆ្នោតជ្រើសតាំងតំណាងរាស្ត្រ នីតិកាលទី៦ មានរយៈពេល ២១ថ្ងៃ គិតចាប់ពីថ្ងៃទី៧ ខែកក្កដា ដល់ថ្ងៃទី២៧ ខែកក្កដា ឆ្នាំ២០១៨។ ក្នុងរយៈពេលនេះ គ.ជ.ប បានប្រកាសពីសកម្មភាពដែលគណបក្សនយោបាយ និងបេក្ខជនឈរឈ្មោះបោះឆ្នោត គួរធ្វើ និងពីរឿងដែលមិនត្រូវធ្វើ។
សកម្មភាព ដែលគណបក្សនយោបាយ និងបេក្ខជនឈរឈ្មោះបោះឆ្នោត ធ្វើការផ្សព្វផ្សាយកម្មវិធីនយោបាយរបស់ខ្លួន ជូនអ្នកបោះឆ្នោត រួមមាន៖
ការជួបជុំជាសាធារណៈរបស់គណបក្សនយោបាយ ឬបេក្ខជន
ការរៀបចំក្បួនព្យុហយាត្រា ឬក្បួនដំណើរដោយក្រុមថ្មើរជើង ឬដោយយានជំនិះគ្រប់ប្រភេទ នៅរាជធានី ខេត្ត ក្រុង ស្រុក ខណ្ឌ
ការជួបប្រជុំ ឬការឃោសនាតាមផ្ទះប្រជាពលរដ្ឋ
ការផ្សព្វផ្សាយតាមវិទ្យុ ទូរទស្សន៍ ឬសារព័ត៌មាន
ការឃោសនាតាមឧបករណ៍បំពងសំឡេង ឬការចាក់ផ្សាយកាសែតវីដេអូ វីស៊ីឌី ឬឌីវីឌី
ការបិទផ្សាយបដាពាក្យស្លោក ឬកម្មវិធីនយោបាយ ឬរូបភាពឃោសនា
ការចែកចាយខិត្តប័ណ្ណ ស្លាកសញ្ញាគណបក្ស ឬមួក សម្លៀកបំពាក់ ដែលមានស្លាកសញ្ញាគណបក្ស ឬបេក្ខជន ជូនអ្នកបោះឆ្នោត ជាដើម។
គ.ជ.ប ក៏បានប្រកាសថា គ្រប់សកម្មភាពឃោសនាបោះឆ្នោតរបស់គណបក្សនយោបាយ ត្រូវចាប់ផ្តើមពីម៉ោង ៦ ព្រឹក ដល់ម៉ោង ១០ យប់ និងត្រូវឈប់សម្រាក នៅចន្លោះពីម៉ោង ១០យប់ ដល់ម៉ោង ៦ព្រឹក។
ចំណែកសកម្មភាពឃោសនាបោះឆ្នោត ដោយឧបករណ៍បំពងសំឡេង ដែលត្រូវ គ.ជ.ប ហាមឃាត់គណបក្សនយោបាយ និងបេក្ខជនឃោសនា រួមមាន៖
ហាមឃាត់ជាទូទៅ ចាប់ពីម៉ោង ១២ ថ្ងៃត្រង់ ដល់ម៉ោង ២ រសៀល
ហាមឃាត់ប្រើឧបករណ៍បំពងសំឡេង នៅក្បែរមន្ទីរពេទ្យ
ហាមឃាត់ប្រើឧបករណ៍បំពងសំឡេង នៅក្បែរសាលារៀន ឬគ្រឹះស្ថានសិក្សានានា ក្នុងពេលម៉ោងសិស្សកំពុងសិក្សា។
ជាមួយគ្នានោះ គ.ជ.ប ក៏បានប្រកាសថា គណបក្សនយោបាយឈរឈ្មោះបោះឆ្នោត អាចហែក្បួនព្យុហយាត្រា នៅរាជធានី ខេត្ត ក្រុង ស្រុក ខណ្ឌ យ៉ាងច្រើន ៤ ដង ក្នុងអំឡុងពេលឃោសនាបោះឆ្នោត រយៈពេល ២១ ថ្ងៃនេះ ហើយការហែក្បួននេះ មិនត្រូវអនុញ្ញាតឲ្យធ្វើឆ្លងរាជធានី ខេត្តទេ ៕
អត្ថបទ៖ លីហៀង
The post ពេលឃោសនាបោះឆ្នោត តើគណបក្សនយោបាយ ត្រូវធ្វើអ្វី និងមិនត្រូវធ្វើអ្វីខ្លះ? appeared first on Khmer Readers.
