អស្ចារ្យមែន! សេវារៀបការប្ដីក្លែងក្លាយ នៅវៀតណាម កំពុងតែកើនឡើង ពិសេសនៅហាណូយ

ក្រុងហាណូយ: ក្នុងថ្ងៃរៀបការ មើលពីសម្បកក្រៅ កូនក្រមុំឈ្មោះ ខា គ្រងឈុតរ៉ូបពណ៌សដ៏ស្អាតឥតខ្ចោះ ប៉ុន្តែក្នុងទ្រូងរបស់នារីវ័យ ២៧ ឆ្នាំរូបនេះបៀមទុកនូវអាថ៌កំបាំងពពោះ ៣ ខែ ទាំងបុរស ដែលដឹកដៃនាងចូលរោងថ្ងៃនេះ គឺជាស្វាមីក្លែងក្លាយ។

ទាំងដឹងខ្លួនថាធ្វើខុសក្រឹត្យក្រមប្រពៃណីវៀតណាម នាង ខា បានរៀបរាប់ថា៖ «ឪពុកម្ដាយខ្ញុំនឹងអាម៉ាស់ខ្លាំង បើខ្ញុំមានកូនគ្មានប្ដី»។

នាង ខា បានចំណាយប្រាក់ ១៥០០ ដុល្លារជួលសេវារៀបការក្លែងក្លាយ ដើម្បីលុបលាងភាពអាប់ឱនកិត្តិយស។

សេវាជួលតួអង្គដែលនឹងសម្ដែងជាភ្ញៀវ កូនកំលោះ និងគ្រួសារសាច់ថ្លៃនៅប្រទេសវៀតណាម មានការកើនឡើងគួរឲ្យកត់សម្គាល់ ដោយសារតែការមានកូនមុនរៀបការ និងការជឿតម្រាគ្រូទាយជាដើម។ កញ្ចប់សេវា មានជួលតួសម្ដែងជាសាច់ញាតិ និងភ្ញៀវទ្រង់ទ្រាយធំនោះ មានតម្លៃរហូតដល់ ៤ ៤០០ ដុល្លារ។

នាង ខា និងប្ដីក្លែងក្លាយរបស់នាងមិនដែលបានចុះសំបុត្រអាពាហ៍ពិពាហ៍ទេ តែនាងពេញចិត្តហើយ ដែលបុរសនោះដើរតួជាប្ដីបំពេញ មុខមាត់ឲ្យគ្រួសារនាង។ នាងបានពោលថា៖ «ខ្ញុំមានអារម្មណ៍ដូចជាប៊ិះលង់ទឹក ហើយក៏រើសបានអាវពោង»។

យ៉ាងណា នាងក៏គ្រោងនឹងធ្វើការលែងលះប្ដីក្លែងក្លាយ និងសុខចិត្តធ្វើជាម្ដាយចិញ្ចឹមកូនតែម្នាក់ឯង។

ស្ថាបនិកក្រុមហ៊ុនផ្ដល់សេវារៀបការក្លែងក្លាយ។

ក្នុងចំណោមប្រជាជន ៩៣ លាននាក់ នៅវៀតណាម ជាង ៥០ ភាគរយជាយុវជនវ័យក្រោម ៣០ឆ្នាំ។ គូស្នេហ៍យុវជនភាគច្រើនបានជ្រើសរើសការរួមរស់ជាមួយគ្នាមុនរៀបការ។

ទន្ទឹមនឹងនោះ អត្រារម្លូត កូនក៏កើនឡើងខ្ពស់ ជាមួយតួលេខ ៣០ ម៉ឺន ត្រូវបានចុះបញ្ជីកាលពីឆ្នាំមុន។ កត្តានេះត្រូវបានចិត្តវិទ្យា ង្វៀង ឌុយកុង លើកឡើងថា យុវវ័យជំនាន់ថ្មីនៅរងសម្ពាធប្រពៃណីដ៏តឹងរ៊ឹងង។

លោកបញ្ជាក់ថា៖ «ពួកគេគ្មានភាពក្លាហានក្នុងការធ្វើអ្វីៗតាមចិត្ត និងជួនកាលអ្វីដែលជ្រុលជ្រួសទាមទារនូវ ការកែខៃបំពេញចិត្តគ្រួសារ»។

ស្ថាបនិកក្រុមហ៊ុនផ្ដល់សេវាជួលប្ដីប្រពន្ធក្លែងក្លាយ លោក ង្វៀង សួនធាន ដែលមានបទពិសោធរៀបចំមង្គលការក្លែងក្លាយរាប់ពាន់ដងមកហើយនោះបានលើកឡើងថា៖ «នេះគឺជាសារគួរឲ្យបារម្ភចំពោះសង្គមរបស់យើង។ កន្លែងខ្ញុំបីដូចជាមន្ទីរពេទ្យមើលអ្នក ជំងឺអ៊ីចឹង។ ខ្ញុំមិនសប្បាយចិត្តទេ ដែលមានភ្ញៀវមករកសេវាច្រើនបែបនេះ»៕