ជនជាតិវៀតណាមរាប់សិបនាក់ ត្រូវបានប៉ូលិសកោះហៅឲ្យទៅបង្ហាញឯកសារដល់ប៉ូលិសអន្តោប្រវេសន៍នៅផ្សារបូរីរុងរឿង កាលពីម្សិលមិញ ដើម្បីពិនិត្យនឹងដកហូតឯកសារមិនប្រក្រតីរបស់ពួកគេ ដោយការអនុវត្តនេះគឺជាយុទ្ធនាការលុបចោល ឬដកហូតឯកសាររដ្ឋបាលកម្ពុជា មិនប្រក្រតីដែលកាន់កាប់ដោយជនបរទេស ។
យុទ្ធនាការលុបចោល «ឯកសារមិនប្រក្រតី» ដែលមានប្រហែល ៧០ ០០០ នាក់គឺបានចាប់ផ្តើមនៅក្នុងខេត្ត កំពង់ឆ្នាំង កាលពីខែមុន។ មនុស្សភាគច្រើនដែលកាសែតភ្នំពេញប៉ុស្តិ៍បាន សម្ភាសគឺពួកគេមិនមានឯកសារណាផ្សេងទៀតនោះទេ ខណៈដែលពួកគេបានរស់នៅក្នុងប្រទេសកម្ពុជាអស់រយៈពេលជាច្រើនជំនាន់មកហើយនោះ ប៉ុន្តែមួយចំនួនបានភៀសខ្លួនក្នុងរយៈពេលខ្លីអំឡុងពេលមានរបបប្រល័យពូជសាសន៍លើជនជាតិវៀតណាមនៅក្រោមរបបខ្មែរក្រហមនោះ។
យុទ្ធនាការដូចគ្នានេះត្រូវបានធ្វើឡើងជាថ្មីម្តងទៀតនៅក្នុងសង្កាត់ជ្រោយចង្វារ រាជធានីភ្នំពេញកាលពីម្សិលមិញ។
លោក ង៉ុក យឿង អាយុ ៧៨ ឆ្នាំបានរស់នៅក្នុងប្រទេស កម្ពុជាពេញមួយជីវិតរបស់លោកទៅហើយនោះបានពន្យល់ថា៖« ជីដូនជីតានិងឪពុកម្តាយរបស់យើងបានកើតនៅទីនេះ ទោះបីខ្ញុំមិនបានដឹងថាមានប៉ុន្មានជំនាន់ក៏ដោយ»។
លោក យឿង ថ្លែងថា៖«ពួកយើងព្រួយបារម្ភអំពីការរឹបអូសឯកសារនេះ ប៉ុន្តែយើងគ្មានជម្រើសនោះទេ។ យើងត្រូវតែធ្វើតាមពួកគេ នេះគឺជាប្រទេសរបស់ពួកគេ មិនមែនជាប្រទេសរបស់យើងទេ»។
លោកពន្យល់ថា៖«មេឃុំនិងអាជ្ញាធររបស់យើងបានដឹងថា យើងបានកើតនៅទីនេះហើយបានរស់នៅទីនេះតាំងពីយូរយាណាស់មកហើយ ប៉ុន្តែឥឡូវនេះ ពួកគេមកនិយាយថា យើងគឺជាជនជាតិវៀតណាម… យើងមានឯកសារស្របច្បាប់មានប័ណ្ណកម្មសិទ្ធិដីធ្លីនិងផ្ទះសម្បែង ប៉ុន្តែប្រសិនបើពួកគេបង្ខំយើងឲ្យរើចេញនោះ យើងនឹងធ្វើតាម។ យើងមិនអាច ប្រឆាំងជាមួយពួកគេបានទេ»។
ទន្ទឹមនឹងនេះដែរ ប៉ូលិសបានបង្ហាញការមិនសប្បាយចិត្តជាមួយអ្នកសារព័ត៌មានទេដោយបានទាមទារឱ្យលុបរូបថតចេញនិងព្យាយាមរារាំងមិនឲ្យធ្វើបទសម្ភាសន៍នៅលើផ្លូវសាធារណៈខាងក្រៅផ្សារនោះទេ។
ការព្យាយាមចូលទៅកាន់ប៉ុស្តិ៍ប៉ូលិសនៅក្បែរនោះគឺត្រូវបានរងការគេស្ដីបន្ទោស ដោយមានមន្ត្រីម្នាក់បានអះអាងថា៖ «ពួកគេមិនអនុញ្ញាតឱ្យថតរូបប៉ុស្តិ៍ប៉ូលិសទេ»។
អ្នកស្រី ង៉ុកតូប មិនមានទំនាក់ទំនងជាមួយលោក យឿង ទេប៉ុន្តែអ្នកស្រីជួបរឿងរ៉ាងស្រដៀងគ្នា។ អ្នកស្រីដែលកំពុងអង្គុយក្រោមម្លប់ឈើនៅក្បែរផ្សារនោះបានថ្លែងថា៖« ជីដូនជីតារបស់ខ្ញុំបានកើតនៅទីនេះ ហើយខ្ញុំក៏បានចាត់ទុកខ្លួនឯងថា ជាជនជាតិខ្មែរដែរ ប៉ុន្តែឥឡូវនេះពួកគេបានចោទប្រកាន់យើងថា ជាជនជាតិវៀតណាម ហើយចង់ដកហូតឯកសាររបស់ពួកយើង»។
អ្នកស្រី តូប ក៏ដឹងថា គាត់គ្មានអំណាចអ្វីទៅប្រឈមមុខជាមួយនឹងអាជ្ញាធរដែរ។
អ្នកស្រីបញ្ជាក់ថា៖«ប្រសិនបើពួកគេចង់ឱ្យយើងរស់នៅយើងនឹងនៅប៉ុន្តែបើសិនគេចង់ឱ្យយើងចាកចេញនោះយើងនឹងចាកចេញ។ តើយើងអាចធ្វើអ្វីបាន? ឲ្យវាទៅអញ្ចឹងទៅធ្វើម៉េចបើយើងរស់នៅក្រោមបង្គាប់របស់ពួកគេ»។
លោក អៀងតេង សម្លៀកបំពាក់ប្រលាក់ដោយប្រេង ខណៈដែលគាត់កំពុងនាំគ្រួសាររបស់គាត់ដើរចូលរថយន្តរបស់គាត់ បន្ទាប់ពីឯកសាររបស់គាត់ត្រូវបានរឹបអូសបានថ្លែងថា៖ «យើងមិនអាចធ្វើការតវ៉ាទៅនឹងបញ្ហានេះបានទេ បើទោះជា យើងមានសៀវភៅគ្រួសារជនជាតិខ្មែរនិងប័ណ្ណកម្មសិទិ្ធដីធ្លីក៏ដោយ… ឥឡូវនេះពួកគេមិនអនុញ្ញាតឱ្យយើងក្លាយជាពលរដ្ឋកម្ពុជាទេ ប៉ុន្តែអនុញ្ញាតឱ្យយើងក្លាយជាជនអន្តោប្រវេសន៍វិញ»។
លោកបានបន្ថែមថា៖« មិនមានអ្វីដែលយើងអាចធ្វើបានទេ ហើយប្រសិនបើយើងធ្វើ នោះពួកគេនឹងចាប់ខ្លួនយើង ហើយផាកពិន័យដូច្នេះហើយយើងត្រូវគោរពតាមពួកគេ។ ពួកគេបានរឹបអូសអ្វីៗគ្រប់យ៉ាងរួមទាំងសៀវភៅគ្រួសារអត្តសញ្ញាណប័ណ្ណនិងឯកសារផ្សេងៗទៀតហើយអោយត្រលប់មកវិញនូវប័ណ្ណអន្តោប្រវេសន៍… វាបំពានសិទ្ធិរបស់យើងប៉ុន្តែយើងមិនអាចតវ៉ាបានទេ»។
ជាសរុបការបង្ក្រាបនេះនឹងប៉ះពាល់ដល់មនុស្សប្រមាណ ២០ ០០០ នាក់ នៅក្នុងរាជធានីភ្នំពេញ នេះបើយោងតាមភ្នាក់ងារព័ត៌មាន Fresh News ។
មន្ត្រីអន្តោប្រវេសន៍បានបញ្ជាក់ថា ដំណើរការនេះនឹងប្រព្រឹត្តទៅនៅគ្រប់ខេត្ដទាំងអស់នៅក្នុងប្រទេសកម្ពុជា ជាមួយគ្នានេះដែរសារព័ត៌មានរដ្ឋាភិបាល AKP បានប្រកាសថា កិច្ចប្រជុំបឋមមួយត្រូវបានធ្វើឡើងកាលពីថ្ងៃច័ន្ទ នៅខេត្ត ព្រះសីហនុ។
កាលពីម្សិលមិញ ប្រធានមជ្ឈមណ្ឌលសិទិ្ធមនុស្សកម្ពុជា លោកស្រី ចក់ សុភាព បានថ្លែងថា៖ «ការដកហូតឯកសាររបស់បុគ្គលដែលបានរស់នៅក្នុងប្រទេសកម្ពុជាអស់ជាច្រើនជំនាន់និងអ្នកដែលគ្មានសញ្ជាតិផ្សេងទៀតនោះគឺធ្វើឱ្យពួកគេមិនត្រូវបានគេទទួលស្គាល់ថា ជាពលរដ្ឋនៃប្រទេសណាមួយ ហើយបានរារាំងពួកគេមិនឲ្យទទួលបាននូវសិទ្ធិជាមូលដ្ឋានជាច្រើន ដូចជាសិទ្ធិទទួលបានការថែទាំសុខភាព សិទ្ធិទទួលការអប់រំ ឬសិទ្ធិបំពេញការងារជាដើម»។
លោកស្រីបានថ្លែងតាមរយៈអ៊ីមែលថា៖ «អ្វីដែលត្រូវការគឺការវាយតម្លៃដោយមានតម្លាភាព មិនលំអៀង ឆាប់រហ័សនិងយុត្តិធម៌ដោយវាយតម្លៃអំពីស្ថានភាពរបស់បុគ្គលនីមួយៗមួយករណីម្តងៗ»។
ប៉ុន្តែខណៈ ដែលក្រុមអ្នកសង្កេតការណ៍សិទ្ធិមនុស្សបានសម្តែងការព្រួយបារម្ភនោះ មានជំនួយតិចតួចប៉ុណ្ណោះត្រូវបានផ្តល់ជូនពួកគេ។
លោក ស៊ន ប៊ុតម៉ៅ ប្រធានអង្គការសិទ្ធិជនជាតិភាគតិចបានថ្លែងថា ក្រុមកាងាររបស់គាត់នៅខេត្ត កំពង់ឆ្នាំង បានរាយការណ៍អំពីស្ថានភាពនេះហើយពួកគេ «កំពុងតាមដានលើករណីនេះ»។
ទន្ទឹមនឹងនេះដែរសមាគម ខ្មែរ-វៀតណាម បានសម្តែងការគាំទ្ររបស់ពួកគេចំពោះគំនិតផ្តួចផ្តើមនេះ។
លោក រស់ ចំរើន អនុប្រធានសមាគមនេះបានថ្លែងថា៖« ប្រជាពលរដ្ឋមិនមានសិទ្ធិកាន់កាប់ឯកសារដែលចេញដោយរដ្ឋាភិបាលកម្ពុជាដែលមិនប្រក្រតី… ពួកគេគ្រាន់តែដកហូតឯកសារមិនប្រក្រតី ពួកគេមិនបានធ្វើបាបយើងទេ»។
លោក ចំរើន បញ្ជាក់ថា៖«ស្ថានទូតវៀតណាមបានអំពាវនាវដល់ដល់ក្រុមហ៊ុនឯកជនឲ្យជួយគាំទ្រហិរញ្ញវត្ថុចំនួន ២៥០ ០០០ រៀល (៦២,៥ ដុល្លារ) ដល់ជនជាតិវៀតណាមដែលរស់នៅក្នុងប្រទេសកម្ពុជាដោយខុសច្បាប់។
តំណាងមកពីស្ថានទូតវៀតណាម បានបដិសេធមិនធ្វើអត្ថាធិប្បាយទេ៕ NS
ប្រភព៖ ភ្នំពេញប៉ុស្ដិ៍
The post រដ្ឋាភិបាលកម្ពុជា ហាក់គ្មានសមត្ថភាពដោះស្រាយល្អប្រសើរ រឿងយួននៅដីខ្មែរតជំនាន់ appeared first on Khmer Readers.