ក្នុងសប្តាហ៍នេះ ពលរដ្ឋខ្មែររស់នៅសហរដ្ឋអាមេរិកជាច្រើនរយនាក់ ដែលមកពីតាមបណ្ដារដ្ឋជាង៣០ ក្នុងសហរដ្ឋអាមេរិក បានប្រមូលផ្តុំគ្នាធ្វើមហាបាតុកម្ម នៅខាងមុខសេតវិមានប្រធានាធិបតី សហរដ្ឋអាមេរិកក្នុងរដ្ឋធានីវាស៊ីនតោន Washington ដោយមានការចូលរួមពីអតីតថ្នាក់ដឹកនាំគណបក្សសង្គ្រោះជាតិ មួយចំនួន ដែលបានគេចខ្លួនពីកម្ពុជាផងដែរ។
ក្រុមបាតុករ ទាមទារឲ្យរដ្ឋាភិបាល សហរដ្ឋអាមេរិកស្វែងរកការដោះលែង លោកកឹម សុខា ដោះលែងអ្នកទោសនយោបាយទាំងឡាយ និងទម្លាក់ចោលការចោទ ប្រកាន់នានាមកលើលោកសម រង្ស៊ី អតីតប្រធានគណបក្សសង្គ្រោះជាតិ ដើម្បីអាចឲ្យលោកវិលត្រឡប់ទៅចូលរួមការបោះឆ្នោតនៅកម្ពុជា ដោយគ្មានការភ័យខ្លាច។ ជាងនេះទៅទៀតពួកគេទាមទារឲ្យ រដ្ឋាភិបាលក្រុងវ៉ាស៊ីនតុន ធ្វើយ៉ាងណាដាក់សម្ពាធដល់រដ្ឋាភិបាលកម្ពុជា ឲ្យបានធ្ងន់ធ្ងរថែមទៀត ។
ប៉ុន្តែករណីនេះ ត្រូវបានលោកផៃ ស៊ីផាន មន្ត្រីជាន់ខ្ពស់ និងជាអ្នកនាំពាក្យរដ្ឋាភិបាលចាត់ទុកព្រឹតិ្តការណ៍បាតុកម្មនៅសហរដ្ឋអាមេរិក ការកៀរគរនយោបាយបរទេស មកដាក់សម្ពោធ បង្ខំប្រឆាំងនឹងតុលាការខ្មែរ ប្រឆាំងនឹងរដ្ឋធម្មនុញ្ញខ្មែរ ជាបំណងទុច្ចរិតពិតប្រាកដ នៃអំពើ ដែលចាត់ទុកថា “រដ្ឋប្រហារ”។
លោកផៃ ស៊ីផាន និយាយថា នៅពេលដែលប្រទេសមួយ មិនថាមហាអំណាច ឬមិនមហាអំណាចទេ ដែលពាក់ព័ន្ធ និងការពារអតីតគណបក្សប្រឆាំង ជាមួយនឹងគណបក្សទទួលសំឡេងភាគច្រើននៅក្នុងអំណាច ដែលកើតចេញពីការបោះឆ្នោតនោះ គឺមិនមែនជាប្រទេស ដែលគោរព និងលើកតម្កើងប្រជាធិបតេយ្យទេ ក្រៅតែពីដើម្បីការពារផលប្រយោជន៍ខ្លួនឯងបុណ្ណោះ៕
The post លោកផៃ ស៊ីផាន ៖ សកម្មភាពក្រុមអ្នកនយោបាយក្រៅប្រទេសគឺជា «រដ្ឋប្រហារ» appeared first on Khmer Readers.