បើសិនជាយើងក្រឡេកមើលទៅស្ថានភាពនយោបាយកម្ពុជា គណបក្សប្រជាធិបតេយ្យមូលដ្ឋាន ត្រូវបានគម្រាមនាថ្ងៃម្សិលមិញនេះ ថាខ្លួននឹងមិនចូលរួមបោះឆ្នោតខាងមុខឡើយ ប្រសិនបើបក្សកាន់អំណាចនៅតែកៀបសង្កត់ខ្លួន ដែល លោកយ៉ង សាំងកុមារ បាននិយាយទៅកាន់អ្នកសារព័ត៌មាន គឺដោយសារតែបក្សកាន់អំណាចរុះរើស្លាករបស់លោក ដោយមិនបានជូនដំណឹង ដែលការពិតជាក់ស្ដែងនោះ មិនដឹងព័ត៌មានច្បាស់លាស់នៅឡើយទេ ។
ប៉ុន្តែនាថ្ងៃនេះ សារព័ត៌មានក្នុងស្រុក VOA Khmer បានធ្វើការចុះផ្សាយថា ៖
បក្សប្រជាធិបតេយ្យមូលដ្ឋាននឹងចូលរួមការបោះឆ្នោតដោយសម្លឹងជ័យជម្នះ
ដែលការចុះផ្សាយនេះ ហាក់ធ្វើឲ្យមហាជន និងអ្នកគាំទ្រគណបក្សដទៃទៀត ហាក់សើចចម្អកជាខ្លាំងទៅលើគណបក្សមួយនេះ ដោយហេតុថា ប្រហែលជាខ្លួនចង់ធ្វើដូចគណបក្សសង្គ្រោះជាតិកាលមិនទាន់រលាយ ឬខ្លួនចង់បានសមាជិកបក្សសង្គ្រោះជាតិ បោះឆ្នោតគាំទ្រខ្លួន ជំនួសបក្សសង្គ្រោះជាតិហើយមើលទៅ ។
សារព័ត៌មាន VOA បានចុះផ្សាយខ្លះៗ ដែលយើងខ្ញុំនឹងដកស្រង់មួយចំនួនប៉ុណ្ណោះ ដើម្បីឲ្យលោកអ្នកមានអារម្មណ៍ថា បក្សនេះ កំពុងត្រូវបានសារព័ត៌មានក្នុងស្រុកលើកបន្ទុប ដើម្បីចង់ជំនួសគណបក្សដែលតុលការរំលាយកាលពីប៉ុន្មានខែកន្លងទៅ ។
យ៉ាងណាមិញ លោក យ៉ង សាំងកុមារ ហាក់ធ្វើជាសម្ដែងការព្រួយបារម្ភថា បក្សកាន់អំណាច នឹងអាចរំលាយខ្លួន ដូចបក្សសង្គ្រោះជាតិផងដែរ ដើម្បីបង្ហាញទៅអ្នកគាំទ្របក្សសង្គ្រោះជាតិថា ខ្លួនជាគណបក្សដែលកំពុង ធ្វើការងារដូចបក្សសង្គ្រោះជាតិពីខាងដើមដែរ ដែលគោលបំណងរបស់អ្នកនយោបាយរូបនេះ ហាក់ចង់ទាញសម្លេងឆ្នោត ដើម្បីអង្គុយក្នុងរដ្ឋសភាទៅវិញ ។ សូមអានការបកស្រាយរបស់ VOA Khmer ខាងក្រោមនេះ ៖
ខណៈដែលការបោះឆ្នោតជាតិខិតចូលមកដល់ក្នុងខែកក្កដាខាងមុខ គណបក្សប្រជាធិបតេយ្យមូលដ្ឋាន ដែលមានសមាជិកជាន់ខ្ពស់សុទ្ធតែមានអតីតភាពការងារពីអង្គការសង្គមស៊ីវិល បានធ្វើការសម្រេចចិត្តចូលរួមដោយឥតរាថយ បើទោះជាភាពស្របច្បាប់នៃការបោះឆ្នោតនៅកម្ពុជា ស្ថិតក្នុងភាពស្រពេចស្រពិល ក្រោយពីការរំលាយគណបក្សសង្គ្រោះជាតិក៏ដោយ។
ភ្នំពេញ — នៅពេលដែលលោក យ៉ង សាំងកុមារ និងសហការីជាមេដឹកនាំអង្គការសង្គមស៊ីវិលប៉ុន្មានរូបទៀត រួមមានទាំងអ្នកអត្ថាធិប្បាយនយោបាយដ៏ល្បីឈ្មោះគឺលោក កែម ឡី ផង មូលមតិគ្នាចូលរួមស្ថាបនាគណបក្ស និងហក់ចូលឆាកនយោបាយ កាលពីក្រោយការបោះឆ្នោតជាតិ២០១៣ ពួកលោកបានប្រមើលមើលព្រឹត្តិការណ៍ដ៏ធំមួយទុកជាស្រេចគឺថា៖ គណបក្សសង្គ្រោះជាតិ មុខជានឹងត្រូវរំលាយជាក់ជាមិនខានឡើយ។
នៅឆ្នាំ២០១៥ ពួកលោក ក៏បានបង្កើត គណបក្សប្រជាធិបតេយ្យមូលដ្ឋាន ក្នុងអ្វីដែលពួកលោកហៅថា ដើម្បីត្រៀមចូលរួមបំពេញចន្លោះនៃកង្វះចលនាប្រជាធិបតេយ្យសេរី នៅក្នុងព្រឹត្តិការណ៍នៃការរំលាយគណបក្សសង្គ្រោះជាតិឈានចូលមកដល់នៅមុនការបោះឆ្នោតជាតិឆ្នាំ២០១៨។
គណបក្សសង្គ្រោះជាតិ ដែលទទួលបានសំឡេងគាំទ្រប្រហាក់ប្រហែលនឹងគណបក្សប្រជាជនកម្ពុជា កាលពីការបោះឆ្នោតជាតិឆ្នាំ២០១៣ និងការបោះឆ្នោតឃុំសង្កាត់ឆ្នាំ២០១៧កន្លងទៅ ត្រូវបានរំលាយដោយអំណាចសាលដីកាតុលាការកំពូលកាលពីខែវិច្ឆិកា ក្នុងសំណុំរឿង«ក្បត់ជាតិ»មានការឃុបឃិតនឹងបរទេស ដើម្បីរៀបគម្រោងការប៉ែងជើងផ្ដួលរដ្ឋាភិបាលគណបក្សប្រជាជនកម្ពុជារបស់លោកនាយករដ្ឋមន្ត្រី ហ៊ុន សែន ដែលស្ថិតក្នុងអំណាចច្រើនជាងបីទសវត្សរ៍។
ប្រភព៖ VOA Khmer & ភ្នំពេញប៉ុស្ដិ៍
The post បក្សប្រជាធិបតេយ្យមូលដ្ឋាន ម្សិលមិញព្រមានមិនចូលរួមបោះឆ្នោត ថ្ងៃនេះថាចូលរួម appeared first on Khmer Readers.