លោកខឹម វាសនា វាយប្រហារសម្ដេចហ៊ុនសែនយ៉ាងចាស់ដៃនៅថ្ងៃហែបក្សទ្រង់ទ្រាយធំនៅបាត់ដំបងថ្ងៃទី២២ កក្កដានេះ

វីឌីអូដែលលោកខឹម វាសនា លេងសម្ដេចខ្លាំងៗនៅខេត្តបាត់ដំបងថ្ងៃទី២២ កក្កដា ២០១៨

ដូចការគ្រោងទុករបស់ក្រុមការងារគណបក្សសម្ព័ន្ធដើម្បីប្រជាធិបតេយ្យខេត្តបាត់ដំបង ដែលបានផ្សព្វផ្សាយថា គណបក្សនឹងរៀបចំក្បួនឃោសនាទ្រង់ទ្រាយធំបំផុតលើកចុងក្រោយ នៅថ្ងៃទី២២កក្កដារបស់ខ្លួន ពេលនេះបានចេញរូបរាងហើយ។

ព្រលឹមស្រាងៗក្រោមផ្ទៃមេឃស្រទុំ ប្រជាពលរដ្ឋអ្នកគាំទ្រគណបក្សទាំងក្មេងចាស់ប្រុសស្រី ប្រមាណជាង ២ មឺុននាក់ មកពីតាមភូមិស្រុក នៃខេត្តបាត់ដំបង ក៏ប្រមូលផ្តុំគ្នាបង្កើតជាក្បួនឃោសនាបោះឆ្នោតលាតសន្ធឹងតាមបណ្តោយផ្លូវជាតិលេខ ៥ ពីរង្វង់មូលព្រាប ស រហូតដល់រង្វង់មូលលោកតាដំបងគ្រញូង។

មុនក្បួនរថយន្ត និងម៉ូតូរាប់ពាន់គ្រឿង ដែលបញ្ឈរតាមបណ្តោយផ្លូវជាតិទុកជាស្រេចនោះវិលកង់ អ្នកគាំទ្រគណបក្សទាំងអស់បានមកជួបជុំគ្នាឈរតម្រង់ជួរ ដើម្បីត្រងត្រាប់ស្តាប់លោកប្រមុខគណបក្ស ខឹម វាសនា ថ្លែងសារនយោបាយ មុនចេញក្បួនឃោសនារបស់ខ្លួន។

ក្នុងចំណាប់អារម្មណ៍ពេញមួយម៉ោង ប្រមុខគណបក្ស បាននិយាយប្រាប់អ្នកគាំទ្រពីការឆ្លើយតបទៅកាន់អ្នកកាសែតបរទេស ដែលបាននឹងកំពុងសម្រុកមកសំភាសន៍លោកនាពេលកន្លងមកថា បញ្ហារបស់ប្រជាពលរដ្ឋខ្មែរ មិនមែនគោលនយោបាយរបស់គណបក្សនីមួយៗចេញមកឃោសនាមិនល្អនោះទេ ដូចជាវិស័យកសិកម្ម ទេសចរណ៍ សេដ្ឋកិច្ច និងវិស័យដទៃផ្សេងៗទៀត។ ប៉ុន្តែ សំខាន់បំផុតនោះ ទោះល្អប៉ុណ្ណាក៏ដោយ បញ្ហានៅត្រង់ថា ប្រជាពលរដ្ឋមិនជឿលើអ្នកនយោបាយស្រុកខ្មែរទាំងអស់។ ដូច្នេះ ដើម្បីអោយប្រជាពលរដ្ឋគាត់ទុកចិត្តមកលើអ្នកនយោបាយ ដែលមានចិត្តស្មោះត្រង់ចង់ជួយជាតិពិតប្រាកដឡើងវិញ លោក ខឹម វាសនា ប្រើសកម្មភាពជាក់ស្តែង តាមរយៈការពន្យល់ប្រជាពលរដ្ឋឱ្យមើលឃើញធនធានមនុស្សរបស់គណបក្សនូវចំណុច ២ គឺ ទី១ បេះដូងស្មោះត្រង់ និង ទី២ សមត្ថភាពខួរក្បាល។

លោកថ្លែងបែបនេះ ធ្វើឡើងនៅក្នុងពេលឃោសនាបោះឆ្នោតរបស់គណបក្សខ្លួនប្រចាំខេត្តបាត់ដំបង ស្ថិតលើទីលានបាល់ទាត់វាលបែកចាន នៅតាមបណ្តោយផ្លូវជាតិលេខ ៥ ក្នុងសង្កាត់រតនៈ ក្រុងបាត់ដំបង ខេត្តបាត់ដំបង។

លោក ខឹម វាសនា បាននិយាយផ្តោតសំខាន់ទៅលើប្រព័ន្ធដឹកនាំរដ្ឋកម្ពុជា ដែលកំពុងប្រមូលផ្តុំអំណាចទៅលើនាយករដ្ឋមន្ត្រី រហូតមានអំណាចពោលពាសហួសកម្រិត មិនអាចអោយច្បាប់អនុវត្តន៍លើបក្ខពួកក្រុមគ្រួសាររបស់ខ្លួនបាន។ ចំណែកឯក្រុមប្រឆាំងវិញ និយាយតែអំពីឆន្ទៈរបស់មេដឹកនាំ ដោយប្តូរមេដឹកនាំចាស់ចេញ ដាក់មេដឹកនាំថ្មីចូល ដែលវាខុសពីប្រព័ន្ធនៃការដឹកនាំរដ្ឋតាមបែបប្រជាធិបតេយ្យគឺ ប្រជាពលរដ្ឋត្រូវពឹងផ្អែកលើប្រព័ន្ធធានាអំណាច នៃភាពជាម្ចាស់ប្រទេសរបស់ខ្លួន។

លោកបានបញ្ជាក់ហើយបញ្ជាក់ទៀតថា ដំណោះស្រាយស្រុកខ្មែរ មិនមែនមកពីមេដឹកនាំប្រទេសមិនល្អនោះទេ គឺដោយសារតែប្រព័ន្ធមិនល្អ ទើបធ្វើអោយម្ចាស់ឆ្នោតរើសបានមេដឹកនាំមិនល្អ។

បន្ទាប់ពីបិទបញ្ចប់ចំណាប់អារម្មណ៍ភ្លាម ក្រុមការងារគណបក្សខេត្តបាត់ដំបង បាននាំគ្នារូតរះ រៀបចំសណ្តាប់ធ្នាប់ក្បួនរថយន្ត ម៉ូតូ ដ៏ធំវែងអន្លាយ ដែលកំពុងបញ្ឈរនៅតាមបណ្តោយផ្លូវ អោយមានរបៀបរៀបរយមុននឹងចេញដំណើរ។

រូបសញ្ញាជួងពណ៌មាសនៅលើផ្ទាំងក្រណាត់ទឹកប៊ិចបក់រវិចៗ រួមទាំងបដាពាក្យស្លោកជាច្រើនផ្ទាំង ដែលអ្នកចូលរួមទាំងនោះបានចងភ្ជាប់នឹងម៉ូតូ រថយន្តតូចធំ រួចជាស្រេច កំពុងត្រៀមខ្លួនចេញដំណើរទៅតាមក្បាលក្បួនឃោសនា សម្លេងជ័យឃោស ដែលខុសពីគណបក្សដទៃ ក៏បន្លឺឡើងប្រាប់ទៅដល់ប្រជាពលរដ្ឋខ្មែរទាំងអស់ អោយបានដឹងពីគ្រោះថ្នាក់នៃប្រព័ន្ធគ្រប់គ្រងរដ្ឋតាមបែបអំណាចប្រមូលផ្តុំនាំឱ្យកើតមានជាជង្ងឺសង្គមរាប់រយមុខនៅកម្ពុជា ដែលអ្នកនយោបាយខ្មែរផ្សេងទៀតរកមុខចំណងបញ្ហាដ៏ធំសម្បើមមួយនេះមិនឃើញតាំងពីអតីតកាលមក នោះគឺ ប្រភពបញ្ហា អំណាចប្រមូលផ្តុំ ហើយអំណាចប្រមូលផ្តុំ ធ្វើអោយពលរដ្ឋបាត់បង់អំណាចនៃភាពជាម្ចាស់។

សូមបញ្ជាក់ផងដែរថា ក្បួនឃោសនារបស់គណបក្សសម្ព័ន្ធដើម្បីប្រជាធិបតេយ្យដ៏ធំបំផុត ដែលមិនធ្លាប់មានពីកន្លងមក មុនថ្ងៃនៃការបិទយុទ្ធនាការឃោសនាបោះឆ្នោត សម្រាប់អាណិត្តទី ៦ក្នុងឆ្នាំ២០១៨នេះ នឹងត្រូវប្រារព្ធធ្វើឡើងនៅថ្ងៃទី ២៧ កក្កដាខាងមុខ នៅចំកណ្តាលរាជធានីភ្នំពេញ ដែលគ្រោងមានអ្នកចូលរួមប្រមាណជា ៥ ទៅ ៧ មឺុននាក់។ នេះបើយោងទៅតាមសេចក្តីអំពាវនាវរបស់លោក ខឹម វាសនា ប្រមុខគណបក្សសម្ព័ន្ធដើម្បីប្រជាធិបតេយ្យ ដែលមានរូបជួងជាញ្ញាសម្គាល់ និងមានលេខរៀងទី ១០ ក្នុងសន្លឹកឆ្នោត៕ ប្រភពអត្ថបទ៖ League for Democracy Party