ក្រុមអ្នកជួយសង្គ្រោះថៃបានខិតខំប្រឹងប្រែងយ៉ាងខ្លាំង ដើម្បីរិះរកវិធីសាស្ត្រជួយសង្គ្រោះក្មេងៗក្រុមបាល់ទាត់ទាំង១២នាក់ និងគ្រូបង្វឹករបស់ពួកគេចេញមកក្រៅវិញបាន ហើយមកទល់នឹងពេលនេះក្រុមជួយសង្គ្រោះបានឲ្យដឹងថា មានតែវិធីសាស្ត្រមួយតែប៉ុណ្ណោះ ដែលអាចជួយសង្គ្រោះពួកគេបាន គឺការជ្រមុជទឹកចេញពីក្នុងរូងភ្នំនោះ ខណៈដែលដំណោះស្រាយផ្សេងៗទៀតដូចជាការចោះរូងភ្នំជាដើមហាក់មិនអាចធ្វើទៅរួចនោះទេ។
ហើយក្រុមអ្នកជំនាញផ្នែកជ្រមុជទឹកបានឲ្យដឹងបន្ថែមដែរថា វាគឺជារឿងប្រថុយនឹងគ្រោះថ្នាក់ណាស់ក្នុងការនាំកុមារទាំង១៣នាក់ ដែលមានសុខភាពទន់ខ្សោយទាំងអស់នោះចេញពីរូងភ្នំតាមរយៈការមុជទឹកនេះ តែយ៉ាងណាវាជាវិធីសាស្ត្រតែមួយគត់ ដែលគេអាចធ្វើទៅបាន។ គ្រោះថ្នាក់ដែលអាចប្រឈមគឺថា ក្រុមក្មេងៗដែលមិនចេះហែលទឹកទាំងនោះត្រូវជ្រមុជក្រោមទឹកដែលល្អក់មើលអ្វីមិនសូវច្បាស់ និងមានភក់ជាច្រើនផងនោះ ហើយវាមានចម្ងាយប្រមាណជា ២,៥ គីឡូម៉ែត្រឯណោះ ដែលលក្ខខណ្ឌនេះសូម្បីតែមនុស្សពេញវ័យ និងមានសុខភាពធម្មតាមួយចំនួនក៏ពិបាកនឹងធ្វើវាដែរ។
អ្វីដែលគេអាចធ្វើបាននៅពេលនេះគឺនាំយកអាហារ និងថ្នាំសម្រាប់ជួយពួកក្មេងៗដែលកំពុងតែស្ថិតនៅក្នុងរូងភ្នំនោះសិន និងព្យាយាមបូមទឹកចេញបណ្តើរៗផង ហើយរងចាំដល់ពួកគេមានសុខភាពល្អ និងទទួលបានការហ្វឹកហាត់ជំនាញក្នុងការមុជទឹកក្នុងរយៈចម្ងាយឆ្ងាយជាមុនសិន ទើបពួកគេអាចមានលទ្ធភាពមុជទឹកចេញមកក្រៅវិញបាន។ 
សូមរំលឹកឡើងវិញថា កុមារដែលជាកីឡាករបាល់ទាត់ទាំង ១២ នោះមានអាយុចន្លោះពី ១១ ដល់ ១៦ ឆ្នាំ ហើយពួកគេរួមជាមួយនឹងគ្រូបង្វឹកម្នាក់ផង បានជាប់នៅក្នុងរូងភ្នំមួយកន្លែងក្នុងខេត្ត Chiang Rai ប្រទេសថៃជាង ១០ ថ្ងៃមកហើយ៕ ប្រភពអត្ថបទ៖ Khmer Note
The post មានតែវិធីសាស្ត្រ១ហើយតែ១គត់ ដែលធ្វើឲ្យក្មេងៗទាំង១៣នាក់ចេញមកក្រៅបាន គឺ… appeared first on Khmer Readers.