ពលរដ្ឋវៀតណាមផ្ទុះការតវ៉ាក្រោយដឹងថា តំបន់សេដ្ឋកិច្ចពិសេសសម្បទាន ៩៩ ឆ្នាំ ចិនអ្នកគ្រប់គ្រង

នៅថ្ងៃទី១១ ខែមិថុនា ឆ្នាំ២០១៨នេះ សភាពេញអង្គវៀតណាមបានបោះឆ្នោតលើកពេលអនុម័តច្បាប់ ស្ដីពីការផ្ដល់ដីសម្បទានរយៈពេល ៩៩ឆ្នាំឲ្យអ្នកវិនិយោគបរទេស សម្រាប់បង្កើតតំបន់សេដ្ឋកិច្ចពិសេស ។

ការពន្យារពេលនេះ គឺបន្ទាប់ពីមានពលរដ្ឋវៀតណាមជាច្រើន បានប៉ះទង្គិចនឹងប៉ូលិស នៅប្រទេសវៀតណាម កាលពីសប្ដាហ៍មុន ក្នុងការតវ៉ាប្រឆាំងនឹងគម្រោងបង្កើតតំបន់សេដ្ឋកិច្ចពិសេស ដែលគេជឿថា តំបន់ទាំងនេះនឹងត្រូវកាន់កាប់ដោយអ្នកវិនិយោគចិន ។

ប៉ូលិសបង្ក្រាបអ្នកតវ៉ា នៅក្រុងហាណូយ កាលពីថ្ងៃទី១០ មិថុនា (រូបថត៖ BBC)

យោងតាមសារព័ត៌មាន BBC បានឲ្យដឹងថា ប៉ូលិសវៀតណាម បានឃាត់ខ្លួនអ្នកតវ៉ាជាច្រើន នៅក្រុងហាណូយ ព្រមទាំងចុះបង្ក្រាបការតវ៉ានៅបណ្ដាក្រុងមួយចំនួនទៀតផងដែរ។ អ្នកតវ៉ាម្នាក់បានលើកបដាដោយសរសេរថា “មិនត្រូវឲ្យដីសម្បទានទៅចិន សូម្បីតែ១ថ្ងៃក៏ដោយ” ។

អ្នកតវ៉ា បានអះអាងថា រដ្ឋាភិបាលវៀតណាម នឹងផ្ដល់ដីសម្បទានចំនួន ៣ទីតាំង ដើម្បីបង្កើតតំបន់សេដ្ឋកិច្ចពិសេស នៅភាគឦសាន ភាគអាគ្នេយ៍ និងភាគនិរតី ប្រទេស ហើយបញ្ហានេះអាចជាលេសសម្រាប់ចិន ដើម្បីគ្រប់គ្រងកោះឈ្មោះ Van Don ដែលស្ថិតនៅជិតព្រំប្រទល់ប្រទេសទាំងពីរ ។

សូមរំឭកថា រដ្ឋាភិបាលវៀតណាមបានចេញសេចក្ដីព្រាងច្បាប់មួយ ដើម្បីផ្ដល់ដីសម្បទានរយៈពេល ៩៩ ឆ្នាំឲ្យអ្នកវិនិយោគបរទេស ។

ចិន និងវៀតណាម បានប្រឈមមុខដាក់គ្នាលើបញ្ហាព្រំដែនជិត ៤០ឆ្នាំមកហើយ ហើយបច្ចុប្បន្នប្រទេសទាំងពីរកំពុងតែមានជម្លោះពាក់ព័ន្ធនឹងការកាន់កាប់កោះមួយចំនួនដោយចិន នៅសមុទ្រចិនខាងត្បូង ៕