ខេត្តសៀមរាប ៖ នារីបម្រើការងារនៅហាងខារ៉ាអូខេព្រីមា ម្នាក់ទំនងជាតូចចិត្តនឹងក្រុមគ្រួសារ ឬ សង្សារ ស្តីបន្ទោសឱ្យរឿងនាងធ្វើការនៅកន្លែងមិនសមរម្យ(ហាងខារ៉ាអូខេ)នោះ បានជានាងដាច់ចិត្តសរសេរសំបុត្រទុកជាបណ្តាំមួយច្បាប់ រួចក៏សម្រេចចិត្តធ្វើអត្តឃាតចងកសម្លាប់ខ្លួនឯងនឹងក្រមាពណ៌ក្រហម លាយស ដែលមានកម្ពស់២ម៉ែត្រ ចងជាប់នឹងចំរឹងបង្អូចនៅក្នុងបន្ទប់ជួលដេករបស់នាង ស្លាប់ទាំងនៅវ័យក្មេងខ្ចី បង្កឱ្យមានការភ្ញាក់ផ្អើលដល់បន្ទប់ជួលនៅជិតខាង និង ដឹងដល់ម្ចាស់ផ្ទះ ដែលជាសមត្ថកិច្ចផងនោះ បានចុះមកជួយអន្តរាគមន៏ដើម្បីធ្វើកោសល្យវិច្ឆ័យភ្លាមៗផង។
ហេតុការណ៍បង្កឱ្យមានការភ្ញាក់ផ្អើលនេះ បានកើតឡើងនៅវេលាម៉ោង១០និង២៥នាទីព្រឹក ត្រូវនឹងថ្ងៃអង្គារ ២កើត ខែបុស្ស ព.ស២៥៦១ ត្រូវនឹងថ្ងៃទី១៩ ខែធ្នូ ឆ្នាំ២០១៧ ស្ថិតនៅចំណុចក្រុមទី១ ភូមិតាវៀន សង្កាត់សាលាកំរើកក្រុងសៀមរាបខេត្តសៀមរាប ។
តាមប្រភពពីនគរបាលក្រុងសៀមរាប បានឱ្យដឹងនៅល្ងាចថ្ងៃទី១៩ ខែធ្នូ ឆ្នាំ២០១៧ថា បន្ទាប់ពីមានព័ត៌មាន ពីប្រជាពលរដ្ឋបានទូរស័ព្ទមកប្រាប់សមត្ថកិច្ចមូលដ្ឋានថា មានករណីចងកសម្លាប់់នៅក្នុងបន្ទប់ ខណៈពេលនោះត្រូវបានម្ចាស់ផ្ទះដែលជាសមត្ថកិច្ចនគរបាលផងនោះ បានចុះមកដល់រួចរាយការណ៍បន្តទៅឱ្យជំនាញ ។
ប្រភពបានបន្តថា ក្រោយពេលកម្លាំងជំនាញ បានចុះទៅដល់កន្លែងកើតហេតុរួច បានសហការជាមួយម្ចាស់ផ្ទះដើម្បីឱ្យបើកទ្វារបន្ទប់លេខ៨មើល ស្រាប់តែឃើញនារីម្នាក់ ចងកសម្លាប់ខ្លួននិងក្រមាពណ៌ក្រហម លាយសដែលមានកម្ពស់២ម៉ែត្រពីឥដ្ឋចងជាប់នឹងចំរឹងបង្អូច នៅក្នុងបន្ទប់ជួលដេករបស់នាង ហើយក៏នាំគ្នាចូលទៅរួចកាត់ខ្សែនោះចោល ដើម្បីយកសាកសព មកពិនិត្យធ្វើកោសល្យវិច្ឆ័យ ។
ប្រភពបានបញ្ជាក់ថា សាកសពនារីវ័យក្មេង ម្នាក់ ឈ្មោះ នន សារ៉ុម ភេទស្រី អាយុ២២ឆ្នាំ មុខរបរ ជាបុគ្គលិកខារ៉ាអូខេ ព្រីមមា មានស្រុកកំណើតភូមិអូរសំបួរ ឃុំក្តីដូង ស្រុកស្ទឹងសែន ខេត្តកំពង់ធំ បច្ចុប្បន្នស្នាក់នៅជួល បន្ទប់ ភូមិតាវៀន សង្កាត់សាលាកំរើក ក្រុងសៀមរាប ។
ប្រភពបានបញ្ជាក់បន្ថែមទៀតថា នៅក្នុងបន្ទប់ដេករបស់នារីរងគ្រោះ គេបានរកឃើញលិខិតមួយច្បាប់សរសេរដោយផ្ទាល់ដៃរបស់នារីតែម្តង ដោយបានរៀបរាប់ប្រាប់ក្រុមគ្រួសារ និងសង្សាររបស់នាងថា (ញុំសំទោសបងៗផងដែលញុំមិនអាចធ្វើជាប្អូនស្រីដ៏ល្អបាន តែញុំមិនអាចទ្រាំនិងជីវិតបែបនេះតទៅទៀតបានទេ កុំដោយសារតែញុំម្នាក់ធ្វើឱ្យបងៗខ្មាស់គេ សូមបងៗបំភ្លេចញុំចោលទៅ ចាត់ទុកថាបងគ្មានប្អូនស្រីម្នាក់នេះចុះ ជីវិតវេទនាប៉ុណ្ណាទេ ញ៉ុម មិនចង់រស់ទេ បើមានជាតិក្រោយមែន សូមឱ្យក្លាយជាទឹក និងខ្យល់កុំកើតជាមនុស្សអី ពីញ៉ុមដែលស្រឡាញ់បងៗ ទាំងអស់គ្នា លា ហើយណា ពីខ្ញុំ សារ៉ុម)។
ក្រោយពីសមត្ថកិច្ចជំនាញបាន ធ្វើកោសល្យវិច្ឆ័យ រួចរាល់ហើយ សន្និដ្ឋានបានថា ជនរងគ្រោះពិតជាស្លាប់ដោយសារ ធ្វើអត្តឃាតចងក សម្លាប់ខ្លួនពិតប្រាកដមែន គឺគ្មានស្លាកស្នាមអ្វីគួរឱ្យមានការសង្ស័យដែលពាក់ពន្ធនឹងបទល្មើសព្រហ្មទណ្ឌឡើយ ។
បច្ចុប្បន្ន សពនារីរងគ្រោះត្រូវបានសមត្ថកិច្ចប្រគល់ឱ្យក្រុមគ្រួសារយកទៅធ្វើបុណ្យតាមប្រពៃណី ៕
ប្រភព៖ Cambodia Police
The post ចងកសម្លាប់ខ្លួនទាំងវ័យក្មេង បន្សល់ទុកនូវលិខិតបណ្តាំមួយសន្លឹក appeared first on Khmer Readers.