ទីបំផុត ឆ្នេរដ៏ស្រស់ស្អាត«ព្រែកត្រែង» ត្រូវបានសង្គ្រោះឲ្យមានសេរីភាពវិញហើយ

លោក ជា សុផារ៉ា រដ្ឋមន្រ្តីក្រសួងដែនដី នៅល្ងាចថ្ងៃអង្គារនេះ បានចុះទៅត្រួតពិនិត្យ សកម្មភាព ចាក់ដីរំលោភចូលឆ្នេរសមុទ្រ នៅចំណុចឆ្នេរព្រែកត្រែង។ ដំណើរចុះទៅរបស់លោក ជា សុផារ៉ា ធ្វើឡើង តាមបទបញ្ជា លោកនាយករដ្ឋមន្ត្រី ហ៊ុន សែន ។ លោក នាយករដ្ឋមន្ត្រី ក៏បានបញ្ជាឲ្យកាយយកដីដែលចាក់បំពេញចេញ និងរក្សាឆ្នេរធម្មជាតិ ព្រែកត្រែងឲ្យដូចដើម។ នេះបើតាមសេចក្ដីប្រកាសព័ត៌មានរបស់ក្រសួងដែនដី។

នៅទីបំផុតឆ្នេរព្រែកត្រែង ក្នុងស្រុកស្ទឹងហាវ ខេត្តព្រះសីហនុ ត្រូវបានជួយសង្គ្រោះដោយប្រមុខរដ្ឋាភិបាល លោកនាយករដ្ឋមន្ត្រី ហ៊ុន សែន នៅរសៀលថ្ងៃនេះ។ ការរំដោះឆ្នេរព្រែកត្រែង ធ្វើឡើងតាមរយៈការបញ្ជាឲ្យកាយដីចេញ ដែលពីមុនមក មានការចាក់បំពេញក្រោមលេសអភិវឌ្ឍរបស់ក្រុមហ៊ុនឯកជន។ បន្ថែមពីលើបទបញ្ជាឲ្យកាយដី ដែលចាក់បំពេញក្នុងសមុទ្រចេញ លោកនាយករដ្ឋមន្ត្រី ហ៊ុន សែន ក៏បានបញ្ជាឲ្យអភិរក្ស និងរក្សាឆ្នេរ ធម្មជាតិព្រែកត្រែងឲ្យដូចដើម។ ទន្ទឹមនឹងនេះ ក្រសួងដែនដី ក៏បានអំពាវនាវដល់ម្ចាស់ដី នៅតាមឆ្នេរសមុទ្រចៀសវាង នូវសកម្មភាពចាក់ដី រំលោភចូលឆ្នេរសមុទ្រដូច ករណីឆ្នេរព្រែកត្រែងនេះ។

សូមបញ្ជាក់ថា អន្តរាគមន៍ពីសំណាក់ប្រមុខរដ្ឋាភិបាលធ្វើឡើងបន្ទាប់ពីក្រសួងបី រួមមាន ក្រសួងដែនដី ក្រសួងទេសចរណ៍ និងក្រសួងបរិស្ថាន ពួតដៃគ្នាដោះស្រាយបញ្ហាឆ្នេរព្រែកត្រែង នៅក្នុងខេត្តព្រះសីហនុ ដែលការអភិវឌ្ឍត្រង់ចំណុចនេះ នាំឲ្យមានការរិះគន់ខ្លាំងមែនទែនពីសាធារណៈជន។ ការរិះគន់របស់សាធារណៈជន ក៏ធ្វើឡើងបន្ទាប់ពីស្ថានភាពទឹកសមុទ្រប្រែពីពណ៌ខៀវ ទៅជាល្អក់ពណ៌ដី។ ឆ្នេរធម្មជាតិព្រែកត្រែង ត្រូវបានទទួលស្គាល់ថា ជាឆ្នេរមួយដ៏ស្រស់ស្អាត ស្ថិតក្នុងចំណោមឆ្នេរធម្មជាតិ ឯទៀតនៅខេត្តព្រះសីហនុ។

ជាការកត់សម្គាល់ មុនកើតមានអន្តរាគមន៍ដោះស្រាយលើបញ្ហាឆ្នេរព្រែកត្រែងនេះ ក្ដីព្រួយបារម្ភផ្សេងទៀត ក៏កើតឡើងទន្ទឹមគ្នាដែរ គឺមន្ត្រីសង្គមស៊ីវិល និងអ្នកធ្វើការផ្នែកទេសចរណ៍ បារម្ភពីឆ្នេរសមុទ្រកម្ពុជា ប្រឈមនឹងការដកបេក្ខភាពចេញពីបញ្ជីឆ្នេរសមុទ្រស្អាតជាងគេក្នុងពិភពលោក ដែលចំណាត់ថ្នាក់នេះ កម្ពុជាទទួលបានកាលពីឆ្នាំ២០១១។ ផ្អែកតាមច្បាប់ស្ដីពីការគ្រប់គ្រងឆ្នេរ ដែលចេញដោយរដ្ឋាភិបាល រាល់គម្រោងអភិវឌ្ឍន៍នៅតំបន់ឆ្នេរ ត្រូវមានចម្ងាយយ៉ាងហោចណាស់១០០ម៉ែត្រ ពីឆ្នេរឬឆ្ងាយជាងនេះ។

បើតាមការអះអាងរបស់រដ្ឋមន្ត្រីក្រសួងទេសចរណ៍នាពេលកន្លងមក ឆ្នេរព្រែកត្រែង ក៏ស្ថិតនៅក្នុងគម្រោងរបស់ធនាគារអភិវឌ្ឍន៍អាស៊ី ADB ដោយមានការរៀបចំធ្វើផ្លូវនៅតាមតំបន់ឆ្នេរបន្ថែមទៀត ដើម្បីផ្ដល់ភាពងាយស្រួលក្នុងការធ្វើដំណើរកម្សាន្ដ ពីសំណាក់ភ្ញៀវទេសចរ។ ក្នុងឆ្នាំ២០១៧ តំបន់ឆ្នេរសមុទ្រកម្ពុជាទទួលបានទេសចរអន្តរជាតិប្រមាណ ៧៤ម៉ឺននាក់កើន ១៥ ភាគរយ៕

ប្រភពអត្ថបទ៖ Rfi-Khmer